गाणं कोठे असतं ?
फूलपाखरू फुलावरी बसतं,
गाणं तिथे असतं !
तान्हुल्या बाळासारखं
उगीच आपलं मन हसतं
गाणं तिथे असतं !
दातओठ खाऊन कधी गाणं मिळत नाही,
हावरं हावरं धावून कधी गाणं मिळत नाही !
गाणं कुठे मिळतं ?
टपटप थेंब जिथे फुलं होतात,
हिरवी पानं खेळवणारी मुलं होतात,
झाडांच्या मुळांकडे
कोवळं पाणी वळतं
गाणं तिथे मिळतं !
माझं नसतं,
तुझं नसतं,
पाठीवरचं ओझं नसतं !
मन जेव्हा मोरासारखं आनंदाने
नाचत नाचत झुलू लागतं
आपण काहिच करीत नाही
गाणं तेव्हा आपोआप फुलू लागतं !
मंगेश पाडगावकर
कोणत्याही टिप्पण्‍या नाहीत:
टिप्पणी पोस्ट करा